दार्चुला । सुदूरपश्चिम प्रदेशका ९ जना सहित देशभर ७४ जनाले जेन–जी प्रदर्शनका क्रममा ज्यान गुमाएका छन्। प्रदर्शनका क्रममा सुदूरपश्चिमका भदौ २३ गते पहिलो दिन तीन जना र दोस्रो दिन ४ जनाले ज्यान गुमाएका हुन। २ जनाले भने आन्दोलनकै क्रममा कारागारबाट भाग्दै गर्दा ज्यान गुमाएका छन्।

भदौँ २३ गते प्रहरीले चलाएको गोली लागेर बैतडीको दोगडाकेदार गाउँपालिका वडा नम्बर १ भादडा पुर्खौली घर भइ हाल धनगढी उपमहानगरपालिका–५ तारानगरका गौरव जोशीको निधन भएको थियो। २७ वर्षीय गौरव तीन वर्षअघि धनगढीको ऐश्वर्य विद्या निकेतनबाट विज्ञानमा प्लस टु सकेर काठमाडौँ गएका थिए। उनी विदेश जाने तयारीमा थिए। प्रदर्शनका क्रममा वृद्ध आमाबुबा सहाराको टेको नै ढलेको छ। यस्तै २३ गते नै बझाङको खप्तड छान्ना गाउँपालिका–७, गोर्खाली गाउँमा सुवास बोहराको पनि प्रहरीको गोली लागेर भदौ २३ गते निधन भएको छ। २१ वर्षीय सुवास भाषा परीक्षा पास गरेर जापान जाने तयारीमा थिए। तर, जापानको भिसा लागेको केही दिनमै उनका बुबा दीपक बेपत्ता भएपछि उनको जापान जाने सपनामा ब्रेक लागेको थियो। त्यसपछि भारतको बेङलुरु पुगेर फेरी आमाले जापान पठाउने ढाडस दिएपछि काठमाडौँ फर्किएका उनी संसद् भवन अगाडिको गेटमा गोली लागेर निधन भएको हो। छोरोलाई जापान पठाउन भारतको बेङलुरुबाट मजदुरी गर्दै गरेकी आमा र सुवाससँगै काठमाडौँ बस्दै गरेका भाइको बिचल्ली भएको छ। बाजुराको स्वामिकार्तिक खापर गाउँपालिका–२ सुपाना गाउँका २१ वर्षीय योजन बुढा (ओजन)को पनि सोही दिन निधन भएको छ। उनी काठमाडौँको पशुपति क्याम्पसमा स्नातक अध्ययनरत थिए। काठमाडौँमा डेरा गरी बस्ने योजनका बुवा मडीपालले भारतमा मौसमी मजदुरी गर्दै आएका थिए। प्रदर्शनका क्रममा बेपत्ता भएका योजनलाई टाउकामा गहिरो घाउ र एउटा हात भाँचिएको अवस्थामा आफन्तले अस्पतालमा शव फेला पारेका थिए।

कालीमाटीमा प्रहरीले चलाएको गोली लागेर बझाङका २८ वर्षीय भीमराज धामीको भदौ २४ गते निधन भएको थियो। कीर्तिपुर बस्ने भीमराज कृषि व्यवसायी थिए। उनकी श्रीमती, २ महिनाका छोरा र ७५ वर्षकी आमा छन्। प्रहरीको गोली लागेर कञ्चनपुरको भीमदत्त नगरपालिका–११ गड्डाचौकीका ४८ वर्षीय नीरज पन्तको पनि निधन भएको छ। उनी श्रीमती सँगै काठमाडौँको महाराजगन्जमा आयुर्वेदिक औषधि व्यवसाय गर्थे। २५ वर्षअघि काठमाडौँ छिरेका उनी उतै व्यवसाय गरेर बस्दै आएका थिए। प्रदर्शनमा गोली लागेर गम्भीर घाइते भएका बैतडीको शिवनाथ गाउँपालिका–२ का दीपकसिंह साउदको पनि उपचारका क्रममा निधन भएको छ। काठमाडौँको कीर्तिपुरमा बसेर कोरियन भाषा सिकिरहेका उनलाई बुवा कालु सिंहले जेनतेन गरेर छोरालाई भाषा कक्षा लिन काठमाडौँ पठाएका थिए। गोली लागेर गम्भीर घाइते भएका दीपकको शुक्रवार साँझ ८ बजे काठमाडौँको त्रिवि शिक्षण अस्पतालमा उपचारका क्रममा निधन भएको थियो। काठमाडौँमा भएको जेनजी आन्दोलनमा महाराजगन्ज प्रहरी वृत्तमा कार्यरत प्रहरी जवान उत्तम सिंह थापाको पनि भदौ २४ गते निधन भएका थियो। दार्चुलाको लेकम गाउँपालिका–३ लाली घुमखोलीका थापालाई आन्दोलनकारीले डिएसपी भन्दै क्रूर रूपमा कुटीकुटी हत्या गरेका थिए । नौँ महिना पहिले भाइ गुमाएका उत्तमको घरमा अहिले आमा र श्रीमती सहाराविहिन भएका छन् ।

बाँकेको नौबस्तास्थित बाल सुधार गृहमा रहेका भाग्न खोज्दा गोली लागेर ५ जनाको निधन भएको थियो। जसमध्ये २ जना सुदूरपश्चिमका रहेका छन्। गोली लागेर निधन हुनेमा अछामका २१ वर्षका उमेश विष्ट, कैलालीका १९ वर्षका जगत देउवा रहेका छन्। उनीहरू जबरजस्ती करणी मुद्दामा बाल सुधार गृह पुगेका थिए।

हालसम्म जेन जी आन्दोलनका क्रममा ज्यान गुमाउनेको संख्या ७४ जना पुगेको छ । आज कोटेश्वरको भाटभटेनीमा थप एक जनाको शव भेटिए संगै आन्दोलनमा ज्यान गुमाउनेको संख्या ७४ पुगेको हो । यसअघि चुच्चेपाटीको भाटभटेनीबाट डढेको अवस्थामा ७ वटा शव भेटिएको थियो । अस्थिपञ्जरको रूपमा भेटिएका ती शवहरू त्रिवि शिक्षण अस्पताल महाराजञ्जमा राखिएको छ । ती शवको पनि पहिचान भएको छैन । पहिचान नखुलेका शवको डिएनए परीक्षण गर्ने तयारी छ । दुई दिनको आन्दोलनमा देशभर कम्तिमा ७४ जनाको ज्यान जानुका साथै ऐतिहासिक सम्पदाहरु ध्वस्त भएकाछन् । संसद, सिंहदरवार, सर्बोच्च अदालत, सितलनिवास, अख्तियार लगायत सयौँ महत्तपूर्ण कार्यालयमा आगजनी, तोडफोड र लुटपाट गरिएको छ । संस्थागत र नीजि क्षेत्रमा समेत ठूलो क्षति पुगेको छ । ठूलो जनधनको क्षतिपछि देश नै शोकमा डुबेको छ भने आर्थिक रुपमा जरजर बनेको छ ।